2009年6月8日星期一

Modigliani and Miller 的啟示



在初讀finance, 很多朋友都記得 Modigliani and Miller 這兩位唔多識讀個名的鬼佬(我地統稱叫MM), 而家唔係講finance, 我唔詳細講兩位有咩偉大貢獻, 但有樣野很有趣, 佢地話在有稅的世界, 如果你公司有借錢, 會比同樣情況但冇借錢的公司更有價值, 因為你可以慳到稅!!! (借錢要比利息, 咁可以扣稅!)

究竟點解呢? 簡單講, 一間公司賺到錢(除人工後), 都係分到比三個人, 一個係股東, 一係banker 佬, 一個係政府, 正路而言, 我問你欏錢, 你都會問我個原因, 點解你要比錢我?

我地不如逐一分析下, 點解要分錢比以上三個parties 既人?

- 股東

冇辦法, 佢係老細嘛! 蝕賺都係佢食哂!

- 銀行佬

佢真係幫過你喎, 起碼你冇錢周轉, 佢會比你應急, 唔好講banker, 就算大耳窿都係幫左你架, 你本來係要死, 佢借左你, 你都有千分一機會唔駛死喎?

講番銀行, 如果唔係銀行借錢你買樓, 香港有幾多個人可以楂住百幾二百萬cash 去買樓?

冇banker, 邊有咁多人買到樓? 咁你分比佢係應份架喎。

- 政府(交稅)

呢個可能你會認為, 政府幫你好多呀, 我可以拎綜援, 難聽講, 行街人有三急, 個廁所都係政府架啦?

但你諗下, 對公司黎講, 政府幫到佢地d 乜? 公司唔會人有三急, 更冇綜援拎吧?

就算問返中產既你, 政府幫左你d 乜? 你間中去公廁用唔用交萬幾蚊稅? 或者你係女仕更少機會吧? 咁, 佢真係好似冇咩幫過你喎..

九年免費教育? 有冇聽過入學令? 有新聞聽過有個家長(中產)不滿現時教育制度(無聊而昂貴的書簿費, 填鴨無思想式的教育), 索性自己兩公婆教! 結果被法庭告... 政府似乎唔係幫緊佢地, 只不過係做d 政策強迫佢地跟大隊咋喎?

為悲劇默哀

我唔抄文, 有興趣可以去睇下呢單新聞, 有朋友可以話個別事件, 但在教育界參予多年, 我見到既只係冰山一角...

窮青年步父後塵自殺 供養母親弟妹 近期失業被追學貸減綜援
(明報)2009年6月8日 星期一 05:05

http://hk.news.yahoo.com/article/090607/4/ckpi.html

啞子食黃蓮

兩年前, 論壇都有朋友拗:

- 考pbe冇用, 正正經經讀番個degree至係正路, polyu 仲收緊生!

- 外面坊間除左ive 都係九流學店, 冇用!

以上言論有點似成語:『只准州官放火, 不准平民點燈』, 當然, 不是正途出身可能性, 很大機會
是中學時沒努力讀書, 會考高考考不好, 貧苦學生? 這是什麼年代?

正如問司長們, 了唔了解瞓籠屋的經驗一樣, 上層政府統治與下層完全脫節, 不知他們問題在哪, 又胡亂做政策安撫以圖苟安, 又如找個比較會計學研究的教授去教實用會計一樣, 美其名話不屑去教咁低層的知識及人材, 不如話佢地根本唔識?

正如沙士時, 全世界岐視中國人, 中國人岐視香港人, 香港人岐視香港人; 在學界, 藍血大學岐視上三大其餘兩大, 上三大岐視其餘本地大學, 本地大學岐視外國大學, 外國大學岐視冇大學學歷...

所以我向來唔會認為考PBE 同學, 仲可以考埋QP 同學冇料到, 反而, 我覺得佢地 - 叻!!!

又講故仔

曾經有個例子, 一個朋友, F.5 因為要照顧家庭兼職, 會考已考得算OK, 但仍勉強上到F.6, 可惜最終
因要全職工作才能養家輟學, 仍不忙自我進修, 由LCCI, AAT 考起, 儲一輪錢, 又再讀topup degree(oversea),愰眼已近十年, 終到考會計師試最後階段。

轉工時遇番佢F.5 舊同學當上司, 會考零分, 幸家人當公務員, 經升學顧問到澳州留學, 胡胡混混考了CPAA, 讀了master, 回來再轉入HKICPA。

最後會考零分的當會考廿四分的上司!


再講故仔

看倌會問, 這個會計廿四分是否我自己? 不不不! 我的故事在這裡... 那個只是我在海外大學的某某同學而已...

三個同學中, 在下成績比較好, 但又係家境問題, 冇得升中六, 同學甲得兩科合格, 去了旺角珠海讀先修班, 同學乙好一點, 升中六後, 都係麻麻地, 入了樹仁。

大家一直都各自努力, 一次再逢, 同學甲一向當攪手, 有回母校攪舊生會, 想叫我們回去分享給師弟妹聽, 要講自己做什麼, 至知原來我們三個都係做會計, 在下只是中小企會計員一位, 同學甲經珠海學位, 入職稅務局當助理評稅主任, 同學乙已在某上市公司當高級會計師...

命運真的完全能自我操縱?

怨命當然沒作用, 要比較, 咁不如拎小超人同我比吧? 全香港只有一個小超而已, 但我與同學甲乙都總算盡了力做好自己!

但有頭誰想當癩皮? 正如以上新聞主角一樣, 有本事讀到IVE 高級文憑, 但不代表你不用交數萬元一年學費吧?

記得當年讀LCCI ele, 我都唔係好環境, 要問朋友借 $1200 交學費及考試費, 社會其實存在住一班人, 好想去上進, 但限於很多因素, 家庭, 工作, 經濟, 佢地進度好慢, 好簡單講, 邊搵一份OT 少D既會計工, 已經令不少人頭痛!

今日的我像是『不過不失』, 與很多會計師平起平坐, 表現絕唔比他人遜色, 但在爬上來的過程, 困難並唔係什麼挑燈夜讀, 經濟方面, 政府比到我地支援很少...


生活在香港社會, 個人覺得大家真係自求多福, 你既上司可能賺你出身低微, 但無可奈何你有心但無力平反自己出身, 原來IVE 都唔易讀, 要幾萬蚊一年, 我讀個master degree 都係貴dd... 會計界要面對加班, 又要回應商業社會不斷提高 的要求而增值, 保持競爭, 但人工加幅連通脹都追不上, 何來餘錢進修?

捱完IVE, 捱埋topup degree, 已經廿幾萬債, QP 又黎四五萬 (4k 工作坊+考試, 另 6K 上雞精班), 整個會計師的路程, 便幾乎要你 30 萬!

在經濟學初階有所謂disposal income(指你扣除必要開支後的剩餘消費能力), 8-9 千蚊的一個會計文員, 要幾多年要儲到 30 萬? 持續進修基金的 $10000 幫到大家幾多? (唔好計有d 傻更更比學店呃左去讀英文拎哂你一萬quota), 免入息審查貸款手續又煩, 限制又多, 佢地又點幫到呢班中階會計人員(為數相信不少), 去發展香港所謂知識型經濟?

結語

有時升學版真係幾好睇(我正一花生友黎!), 睇住班藍血貴族, 有d 一早有時升去外國留學, 有d 起碼屋企支持你上到大專, 係度對d 持續進修評頭品足... 我又諗住會計版 Gilbert 兄成日講一樣野: 『又話會計行業唔好, 自己又留在會計行業, 有咩居心?』

正如升學版的藍血貴族們一樣, 叫人讀local u啦! 但local u 近年冇乜收人架啦, ouhk 啦! 冇十幾萬? 冇時間, 你諗你啦! (還有, 識得OUHK 係好野, 外面有幾多個丫?)

政府係咪時候, 考慮加強放寬在職人仕進修借貸以及提供更多優惠比佢地? 除此而外, 僱主們都係時候考慮一下, 在讀進修比一個全職學生難度高上很多, 這班人的耐捱程度, 及知識應用在實務的確強很多, 自己請人時, 是需要一個花瓶, 還是一個發奮上進, 實務願捱的員工?